ਪ੍ਰਾਈਵੇਟ ਸਕੂਲਾਂ ਵਲੋਂ ਕੀਤੀ ਜਾ ਰਹੀ ਲੁੱਟ ਤੋਂ ਬਚਾਵੇ ਸਰਕਾਰ - ਨੰਬਰਦਾਰ ਮਾਨ

ਬੰਗਾ 28 ਮਈ ( ਮਨਜਿੰਦਰ ਸਿੰਘ)           ਪ੍ਰਾਈਵੇਟ ਸਕੂਲਾਂ ਵਲੋਂ ਸਾਲਾਨਾ ਫੰਡ, ਕਿਤਾਬਾਂ, ਵਰਦੀਆਂ ਅਤੇ ਹਰ ਸਾਲ ਆਪਣੀ ਮਰਜੀ ਨਾਲ ਫੀਸਾਂ ਵਧਾ ਕੇ ਮਾਪਿਆਂ ਦੀ ਕੀਤੀ ਜਾ ਰਹੀ ਲੁੱਟ ਤੇ  ਸਰਕਾਰ ਗੰਭੀਰਤਾ ਅਤੇ  ਸਖਤੀ ਨਾਲ ਰੋਕ ਲਾਵੇ ਇਨ੍ਹਾਂ ਗੱਲਾਂ ਦਾ ਪ੍ਰਗਟਾਵਾ ਕਰਦਿਆਂ ਬੰਗਾ ਦੇ  ਐਨ ਆਰ ਆਈ ਨੰਬਰਦਾਰ ਅਤੇ ਅਕਾਲੀ ਦਲ ਬਾਦਲ ਦੇ ਜਨਰਲ ਕੌਂਸਲ ਮੇਂਬਰ ਇੰਦਰਜੀਤ ਸਿੰਘ ਮਾਨ ਨੇ ਕਿਹਾ  ਕਿ  ਪੰਜਾਬ ਅੰਦਰ ਨਿਜੀ ਪ੍ਰਾਈਵੇਟ ਸਕੂਲ ਸਿਖਿਆ ਦਾ ਵਪਾਰੀਕਰਨ ਕਰ ਕੇ ਮਾਪਿਆਂ ਨੂੰ ਸ਼ਰੇਆਮ ਲੁੱਟ ਰਹੇ ਹਨ ਜਿਸ ਕਾਰਨ ਮੱਧਵਰਗ ਅਤੇ ਗਰੀਬ ਪਰੀਵਾਰਾਂ ਲਈ ਬੱਚਿਆਂ ਨੂੰ ਸਿਖਿਆ ਦੇਣਾ ਉਨ੍ਹਾਂ ਦੀ ਪਹੁੰਚ ਤੋਂ ਬਾਹਰ ਹੁੰਦਾ ਜਾ ਰਿਹਾ ਹੈ | ਦਾਖਲਾ ਫੀਸ ਹਰ ਸਾਲ ਲੈਣ ਦਾ ਕੋਈ ਤਰਕ ਨਹੀਂ ਬਣਦਾ | ਉਨ੍ਹਾਂ ਕਿਹਾ ਕਿ ਇਹ ਸਕੂਲ ਹਰ ਸਾਲ ਬਿਲਡਿੰਗ ਫੰਡ, ਕਿਤਾਬਾਂ ਤੇ ਵਰਦੀਆਂ   ਦੀ ਕਾਲਾ ਬਜਾਰੀ, ਛੁਟੀਆ  ਦੌਰਾਨ  ਬੱਸ ਕਿਰਾਇਆ ਅਤੇ ਹੋਰ ਕਈ ਤਰਾਂ ਦੇ ਸਾਲਾਨਾ ਫੰਡਾ ਦੇ ਨਾਮ ਤੇ ਮਾਪਿਆਂ ਕੋਲੋਂ ਜਬਰਦਸਤੀ ਪੈਸਾ ਵਸੂਲਦੇ ਹਨ | ਉਨ੍ਹਾਂ ਕਿਹਾ ਇਥੇ ਹੀ ਬਸ ਨਹੀਂ ਕੋਰੋਨਾ ਮਹਾਮਾਰੀ ਕਾਰਨ 21ਮਾਰਚ ਤੋਂ ਸਕੂਲ ਬੰਦ ਹਨ ਪਰ ਬਹੁਤੇ ਪ੍ਰਾਈਵੇਟ ਸਕੂਲ ਹਰ ਤਰਾਂ ਦੀ ਫੀਸ ਅਤੇ ਫੰਡਾ ਦੀ ਮੰਗ ਕਰ ਰਹੇ ਹਨ ਅਤੇ ਕੋਈ ਵੀ ਪ੍ਰਾਈਵੇਟ ਸਕੂਲ ਆਰਥਿਕ ਤੌਰ ਤੇ ਗਰੀਬ ਪਰਿਵਾਰ ਦੇ ਬੱਚਿਆਂ ਨੂੰ ਮੁਫ਼ਤ ਦਾਖ਼ਲਾ ਦੇਣ ਅਤੇ ਪੜ੍ਹਾਉਣ ਲਈ ਸਰਕਾਰ ਵਲੋਂ ਜਾਰੀ ਕੀਤੇ ਹੁਕਮਾਂ ਦੀ ਪਾਲਣਾ ਨਹੀਂ ਕਰਦਾ | ਨੰਬਰਦਾਰ ਨੇ  ਮੁੱਖ ਮੰਤਰੀ ਤੋਂ ਪੁਰਜ਼ੋਰ ਮੰਗ ਕਰਦੇ ਕਿਹਾ ਕਿ ਇਨ੍ਹਾਂ ਸਕੂਲਾਂ ਨੂੰ ਮਾਪਿਆਂ ਨੂੰ ਲੁੱਟਣ ਤੋਂ ਤੁਰੰਤ ਰੋਕਿਆ ਜਾਵੇ ਅਤੇ ਲੁੱਟ ਤੋਂ ਬਾਜ ਨਾ ਆਉਣ ਵਾਲੇ ਸਕੂਲਾਂ ਖਿਲਾਫ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ ਇਸ ਮੌਕੇ ਉਨ੍ਹਾਂ ਨਾਲ ਸਤਨਾਮ ਬਾਲੋ, ਦੀਪਕ ਘਈ, ਮੁਖਤਿਆਰ ਸਿੰਘ, ਸੁਰਿੰਦਰ ਕੁਮਾਰ, ਸੰਜੀਵ ਕੁਮਾਰ, ਜਗਬੀਰ ਸਿੰਘ ਅਤੇ ਕੁਲਬੀਰ ਸਿੰਘ ਹਾਜਰ ਸਨ |